មនុស្សគ្រប់គ្នាតែងមានបញ្ហាក្នុងជីវិតរបស់ខ្លួន

រឿងខ្លី៖ មនុស្សគ្រប់គ្នាតែងមានបញ្ហាក្នុងជីវិតរបស់ខ្លួន មានយុវជនអាយុ២៤ឆ្នាំម្នាក់មើលទៅក្រៅបង្អួចរថភ្លើង ហើយស្រែកថា៖ ប៉ា.. មើលនោះ.. ដើមឈើទៅនៅពីក្រោយយើងវិញហើយ!  ឪពុករបស់ក្មេងនោះញញឹម ខណៈដែលមានគូស្នេហ៍មួយគូអង្គុយនៅជិត ហើយកំពុងមើលយុវជនដែលមានចរិកដូចក្មេងដ៏គួរឲ្យអាណិតនោះ។ បន្តិចក្រោយមក យុវជននោះក៏ស្រែកទៀតថា៖ ប៉ា.. មើលពពកកំពុងតែរត់តាមយើងហើយ!  គូស្នេហ៍មួយគូនោះទប់ចិត្តមិនបាន ក៏និយាយទៅកាន់បុរសដែលជាឪពុកថា៖ ហេតុអ្វីក៏លោកអ៊ុំមិនយកកូនប្រុសទៅពេទ្យល្អណាមួយទៅ? បុរសចំណាស់នោះក៏បានតបវិញថា៖ ខ្ញុំបាននាំទៅហើយ.. យើងទើបតែត្រឡប់មកពីពេទ្យតើ.. កូនប្រុសរបស់ខ្ញុំងងឹតភ្នែកពីកំណើត ហើយគាត់ទើបនឹងមើលឃើញថ្ងៃនេះទេ! ។ មនុស្សយើងម្នាក់ៗនៅលើលោកនេះ តែងមានបញ្ហារៀងៗខ្លន។ កុំវាយតម្លៃគេមុននឹងស្គាល់ជននោះឲ្យសោះ ព្រោះភាពពិតអាចនឹងធ្វើឲ្យអ្នកភ្ញាក់ផ្អើល៕

តម្លៃ

តម្លៃ មានវាគ្មិនដ៏ល្បីមួយរូបបានចាប់ផ្តើមសិក្ខាសាលាដោយកាន់ក្រដាស់ប្រាក់១០០ដុល្លារមកជាមួយ។ អ្នកចូលរួមសិក្ខាសាលាមានចំនួនប្រហែល២០០នាក់ បានប្រមូលផ្តុំគ្នាស្តាប់គាត់យ៉ាងយកចិត្តទុកដាក់។ វាគ្មិនរូបនោះបានសួរទៅអ្នកចូលរួមទាំងអស់គ្នាថា៖ អ្នកណាចង់បានប្រាក់១០០ដុល្លារនេះ? អ្នកចូលរួមទាំង២០០នាក់នោះបានលើកដៃទាំងអស់គ្នា។ បន្ទាប់មកវាគ្មិនរូបនោះបាននិយាយថា៖ ក្នុងចំណោមអ្នកទាំងអស់គ្នា មានតែម្នាក់ប៉ុណ្ណោះដែលនឹងទទួលបាន១០០ដុល្លារនេះ ប៉ុន្តែអនុញ្ញាតិឲ្យខ្ញុំធ្វើដូច្នេះសិន… (គាត់ក៏ញីក្រដាស់១០០ដុល្លារនោះ) គាត់ក៏សួរទៀតថា៖ អ្នកណាខ្លះនៅតែចង់បានវា?អ្នកចូលរួមទាំង២០០នាក់នោះនៅតែលើកដៃគ្រប់គ្នា។ ក្រោយមកគាត់ក៏និយាយទៀតថា៖ ចុះបើខ្ញុំធ្វើដូច្នេះ..(គាត់បានទម្លាក់ក្រដាសប្រាក់នោះទៅក្រោម ហើយជាន់ឈ្លីវាឲ្យខ្ទក់).. បន្ទាប់មក គាត់បានលើកក្រដាស១០០ដុល្លារនោះមក ហើយបង្ហាញទៅកាន់អ្នកចូលរួមទាំងអស់ឲ្យឃើញថាក្រដាសប្រាក់១០០ដុល្លារនេះខ្ទក់ខ្ទីរ និងប្រឡាក់ដី។ គាត់ក៏បានសួរទៀតថា៖ អ្នកណាខ្លះនៅតែចង់បាន? មិនខុសពីមុនៗទេ អ្នកចូលរួមទាំងអស់នៅតែលើកដៃគ្រប់គ្នា។ គាត់ក៏បាននិយាយថា៖ មិត្តទាំងឡាយអើយ! ខ្ញុំទើបតែបង្ហាញមេរៀនដ៏មានសារៈសំខាន់មួយទៅអ្នក។ មិនថាខ្ញុំបានធ្វើអ្វីទៅលើលុយនោះទេ អ្នកនៅតែចង់បានវា ព្រោះតម្លៃរបស់វាមិនបានធ្លាក់ចុះទេ។ វានៅតែជាក្រដាស១០០ដុល្លារ។ មានច្រើនដងណាស់ដែលជីវិតរបស់យើងត្រូវបានជួបឧបសគ្គ និងជួបនឹងរឿងហេតុអាក្រក់ៗ។ យើងធ្លាប់បានសម្រេចចិត្តខុស ឬជួបជាមួយនឹងស្ថានភាពដ៏យ៉ាប់យឺនក្នុងជីវិត។ ជួនកាលយើងមានអារម្មណ៍ថាខ្លួនយើងគ្មានតម្លៃ។ ប៉ុន្តែទោះជាមានរឿងអ្វីកើតឡើងក៏ដោយ អ្នកនឹងមិនបាត់បង់តម្លៃរបស់ខ្លួនអ្នកឡើយ។ អ្នកជាមនុស្សពិសេស ចូរកុំភ្លេចតម្លៃរបស់អ្នក!

ក្តីស្រឡាញ់ពិត

ក្តីស្រឡាញ់ពិត មានគ្រួសារអ្នកមានមួយមានកូនប្រុសតែម្នាក់គត់។ កូនប្រុសនោះជាមនុស្សឧស្សាហ៍ ឆ្លាតវាងវៃ និងប្រឹងប្រែងទាំងរៀនសូត្រ ទាំងធ្វើការងារ។ នៅពេលដែលកូននោះចូលដល់វ័យដែលអាចរៀបចំអនាគតគ្រួសារបាន ឪពុកមា្តយក៏បានរៀបចំឲ្យជួបកូនក្រមុំអ្នកមានម្នាក់ ។ កូនប្រុស៖ ប៉ាម៉ាក់… កូនមិនត្រូវការកូនក្រមុំដែលប៉ាម៉ាក់រកឲ្យនោះទេ! នាងសោះកក្រោះ ឆាប់ខឹង ឆេវឆាវ និងមិនចេះធ្វើអ្វីទាំងអស់។ ខ្ញុំស្រឡាញ់ និងចង់រៀបការជាមួយមនុស្សស្រីណាដែលប្រឹងប្រែងធ្វើការងារ តស៊ូ អត់ធ្មត់ និងមានក្តីសង្ឃឹមក្នុងជីវិត។ ឪពុកម្តាយ៖ នាងជាអ្នកណា? កូនប្រុស៖ អ្នកបំរើរបស់យើង! ប៉ាម៉ាក់មិនដែលឃើញចំនុចល្អអំពីនាងខ្លះទេ? នាងធ្វើការតាំងពីព្រលឹមរហូតដល់ព្រលប់ដោយគ្មានត្អូញត្អែរមួយម៉ាត់ទេ.. នាងជាមនុស្សឆ្លាត និងស្មោះត្រង់.. នាងចិត្តធ្ងន់ណាស់! ភ្លាមនោះឪពុកម្តាយទាំងពីរនាក់នោះបានខឹងយ៉ាងខ្លាំង ព្រោះគាត់ចង់ឲ្យកូនរបស់គាត់មានទ្រព្យសម្បត្តិច្រើនជាងនេះទៀត។ ក្រោយមកពួកគាត់ក៏បានសម្រេចចិត្តដេញនារីអ្នកបំរើនោះចេញពីផ្ទះ.. តែកូនប្រុសរបស់គាត់មិនអាចបំភ្លេចនាងបានឡើយ។ ប៉ុន្មានសប្តាហ៍ក្រោយមក ឪពុកបាននិយាយទៅកាន់កូនប្រុសថា៖ បើឯងចង់រៀបការជាមួយស្រីអ្នកក្រនោះ.. ចេញពីផ្ទះរបស់យើងទៅ! យើងនឹងមិនឲ្យអ្វីទៅឯងទេ សូម្បីមួយសេន។ កូនប្រុសនោះក៏បានឆ្លើយតបថា៖ មិនអីទេប៉ា! អ្វីដែលមានសារៈសំខាន់បំផុតសម្រាប់ខ្ញុំ គឺក្តីស្រឡាញ់ដ៏ស្មោះត្រង់។ ខ្ញុំនឹងចេញពីផ្ទះនេះ តែក៏មិនមែនមានន័យថាខ្ញុំមិនស្រលាញ់លោកទាំងពីរដែរ..!  កូនប្រុសនោះក៏បានទៅរស់នៅជាមួយនារីអ្នកក្រនោះ ហើយយកគ្នាជាប្តីប្រពន្ធដោយចិត្តនិងចិត្តដែលពោរពេញទៅដោយក្តីស្រឡាញ់។ មិនយូរប៉ុន្មាន ម្តាយរបស់កូនប្រុសនោះក៏បានមកលេងកូនដោយបានស្នាក់នៅជាមួយចំនួនមួយថ្ងៃ។ គាត់ក៏បាននិយាយទៅកាន់កូនប្រុសតែមួយរបស់គាត់ថា៖ កូនប្រុសសម្លាញ់! យើងញ៉ាំម្ហូបឆ្ងាញ់ៗនៅផ្ទះយើង តែកូនញ៉ាំតែនំប៉័ងក្រៀមនៅទីនេះ។ នៅផ្ទះយើងកូនគេងគ្រែដែលមានពូកទន់ តែកូនគេងក្រាលកន្ទេលនៅទីនេះ។ កូនពិតជាសប្បាយចិត្តមែនឬ? កូនប្រុស៖…

លាងសម្អាតពែងរបស់អ្នក

លាងសម្អាតពែងរបស់អ្នក ខ្ញុំបានចាប់ផ្តើមការងារថ្មីនៅការិយាល័យតូចមួយ ដែលមានគ្នាបួននាក់។ នៅការិយាល័យនោះ មានម៉ាស៊ីនចម្រោះទឹកស្អាតមួយសម្រាប់ប្រើប្រាស់រួមគ្នា។ មានមិត្តរួមការងារម្នាក់បានត្អូញត្អែរថា ទឹកដែលបានចម្រោះនោះមិនមានអនាម័យល្អនោះទេ។ គាត់បានរអ៊ូជាប់គ្នាបីបួនថ្ងៃ តែគាត់ឆ្ងល់ថាហេតុអ្វីបានជាខ្ញុំផឹកទឹកដែលចេញពីម៉ាស៊ីនតែមួយ តែខ្ញុំមិនមានបញ្ហាអ្វីឡើយ។ ក្រោយមក គាត់បានរកឃើញថា បញ្ហាគឺកើតមកពីពែងរបស់គាត់។គាត់មិនបានលាងសម្អាតពែងនោះទេ ហើយពែងដែលគាត់ប្រើនោះមានមេរោគនៅជាប់ជាមួយ។ បន្ទាប់ពីគាត់បានលាងពែងហើយ គាត់បានផឹកទឹកនោះដោយគ្មានបញ្ហាអ្វីទាំងអស់។ ខ្ញុំមិនអាចជួយអ្វីបានច្រើនទេ តែយើងអាចមើលទៅក្នុងសង្គមដែលយើងរស់នៅ។ យើងងាយនឹងបន្ទោសអ្នកដទៃ និងរបស់ផ្សេងៗណាស់ តែយើងមិនសូវដែលបន្ទោសខ្លួនយើងទេ។ អ្នកឯងប្រកាន់ណាស់ អ្នកឯងឬកណាស់ អ្នកឯងជាអ្នកបង្ករបញ្ហា…។ល។  ខ្ញុំដឹងថានៅលើពិភពលោកនេះ គ្មានអ្វីដែលល្អឥតខ្ចោះនោះទេ ប៉ុន្តែជួនកាលយើងត្រូវឈានជើងមកក្រោយមួយជំហ៊ាន រួចសួរខ្លួនឯងនូវសំនួរពិបាកៗមួយចំនួន៖ ១. តើយើងអាចដោះស្រាយវាឲ្យល្អជាងនេះបានទេ? ២. តើបេះដូងរបស់យើងបរិសុទ្ធដែរឬទេ? ៣. តើយើងអាចដោះស្រាយបញ្ហានេះដោយក្តីសណ្តោសបានដែរឬទេ? ខ្ញុំចង់ឲ្យអ្នកដឹងថា អ្នកត្រូវធ្វើឲ្យចិត្តរបស់អ្នកស្អាតស្អំសិន ពីព្រោះនៅពេលដែលស្អាតស្អំ ជីវិតរបស់អ្នកនឹងប្រសើរឡើង។ ប្រភព៖ www.values.com

អាថ៍កំបាំងនៃភាពជោគជ័យ

អាថ៍កំបាំងនៃភាពជោគជ័យ អ្នកកាសែត៖ តើលោកមានអាថ៍កំបាំងអ្វីដែលនាំឲ្យលោកទទួលបានជោគជ័យដល់សព្វថ្ងៃនេះ? សហគ្រិនជោគជ័យ៖ គឺមកពីពាក្យប្រាំម៉ាត់! អ្នកកាសែត៖ ពាក្យអ្វីទៅ? សហគ្រិនជោគជ័យ៖ ការសម្រេចចិត្តត្រូវ! អ្នកកាសែត៖ ធ្វើម៉េចទើបបានសម្រេចចិត្តត្រូវ? សហគ្រិនជោគជ័យ៖ មកពីពាក្យបីម៉ាត់! អ្នកកាសែត៖ ចុះពាក្យអ្វីទៅ? សហគ្រិនជោគជ័យ៖ បទពិសោធន៍! អ្នកកាសែត៖ ហើយធ្វើម៉េចទើបអាចមានបទពិសោធន៍ដែលនាំឲ្យមានការសម្រេចចិត្តត្រូវបានទៅ? សហគ្រិនជោគជ័យ៖ មកពីពាក្យប្រាំម៉ាត់! អ្នកកាសែត៖ ពាក្យអ្វីទៀតទៅ? សហគ្រិនជោគជ័យ៖ ការសម្រេចចិត្តខុស! ជាការពិត រាល់ភាពជោគជ័យ គឺសុទ្ធតែធ្លាប់ឆ្លងកាត់ភាពបរាជ័យ។ ដូច្នេះភាពបរាជ័យ គឺគ្រាន់តែជាជំហ៊ានមួយដែលនាំឲ្យយើងបានលទ្ធផលល្អប្រសើរជាងមុនប៉ុណ្ណោះ។ សូមកុំបោះបង់គោលដៅរបស់អ្នកដោយសារការសម្រេចចិត្តខុសទាំងប៉ុន្មាននោះអី។ យើងត្រូវចេះរៀនពីភាពបរាជ័យ ហើយយកវាមកធ្វើជាបទពិសោធន៍ ដើម្បីភាពជោគជ័យនៅខាងមុខ។

សារបេះដូង

សារបេះដូង ប្រុស៖ អូនសម្លាញ់.. បងដឹងថាវាលឿនពេកសម្រាប់យើងទាំងពីរ ប៉ុន្តែបងពិតជាចង់បានអូនណាស់.. បងមិនមែនសម្តែងទេ តែបងគ្រាន់តែចង់ប្រាប់អូនឲ្យបានដឹងថា បងបារម្ភអំពីអូន បងស្រឡាញ់ និងចង់បានអូន.. ស្រី៖ អូហ៍បង.. អូនក៏ស្រឡាញ់បងដែរ តែអូនខ្លាច.. ប្រុស៖ អូនខ្លាចអ្វីទៅសំណព្វចិត្ត? ស្រី៖ ថ្ងៃណាមួយបងនឹងស្រឡាញ់ស្រីផ្សេង ហើយអូននឹងក្លាយជាអតីតសង្សាររបស់បង.. ប្រុស៖ ប្រាកដហើយអូនសម្លាញ់! ថ្ងៃមួយបងនឹងស្រឡាញ់ស្រីផ្សេងទៀត.. ហើយនារីម្នាក់នោះនឹងហៅអូនថា ម៉ាក់! ព្រោះអូនជាម្តាយរបស់នាង.. ស្រី៖ អូនស្រឡាញ់បងណាស់! ជីវិតយើងមិនមានដប់ឆ្នាំច្រើនដងទេ សូមចែករំលែកក្តីស្រឡាញ់ទៅគ្នាឲ្យបានច្រើនទាន់យើងនៅមានឳកាស។  សូមផ្ញើជូនអ្នកជាទីស្រឡាញ់របស់អ្នក ដើម្បីសម្តែងក្តីស្រឡាញ់សម្រាប់ឆ្នាំថ្មី!

នៅត្រូវកន្លែង!

រឿងអប់រំខ្លី៖ នៅត្រូវកន្លែង! មានសត្វអូដ្ឋពីរក្បាល មេ និងកូន កំពុងដេកសម្រាកនៅក្រោមដើមឈើ។ កូនបានសួរទៅកាន់មេរបស់វាថា៖ ម៉ែ.. ហេតុអ្វីបានជាសត្វអូដ្ឋមានបូគលើខ្នង? មេបានគិតបន្តិចរួចក៏ឆ្លើយថា៖ យើងជាសត្វនៅវាលខ្សាច់ យើងមានបូគគឺដើម្បីផ្ទុកទឹកនិងចំណីសម្រាប់ការរស់នៅរបស់យើង ជាពិសេសពេលយើងធ្វើដំណើរកាត់តាមវាលខ្សាច់។ កូនបានគិតបន្តិចហើយក៏សួរទៀតថា៖ អូហ៍.. ចុះហេតុអ្វីបានជាយើងមានជើងវែងៗ ហើយប្រអប់ជើងមូលៗ? មេបានឆ្លើយថា៖ ប្រអប់ជើងមូល គឺសម្រាប់ដើរកាត់វាលខ្សាច់ណាកូន! កូនស្ងាត់មាត់បន្តិចក៏សួរទៀត៖ ម៉េចបានជារោមភ្នែកយើងវែង? ជូនកាលវាបាំងភ្នែករបស់ខ្ញុំ! មេបានឆ្លើយ៖ យើងមានរោមភ្នែកវែង និងក្រាស់ទាំងនេះ គឺដើម្បីការពារដីខ្សាច់កុំឲ្យចូលភ្នែករបស់យើងពេលខ្យល់បក់។ កូនបានគិតហើយក៏និយាយថា៖ អូហ៍.. បូគសម្រាប់ផ្ទុកទឹកនិងចំណីពេលយើងដើរកាត់វាលខ្សាច់ ជើងវែងនិងប្រអប់ជើងមូលៗសម្រាប់ដើរកាត់វាលខ្សាច់ រោមភ្នែកវែងក្រាស់សម្រាប់ការពារដីហុយចូលភ្នែកពេលដើរកាត់វាលខ្សាច់… តែឥឡូវយើងរស់នៅក្នុងសួនសត្វហ្នឹង? មេរៀន៖ ជំនាញ និងសមត្ថភាពមានប្រយោជន៍តែនៅពេលដែលអ្នកនៅត្រូវកន្លែងប៉ុណ្ណោះ!

សេះនិងទឹក

អ្នកអាចដឹកសេះទៅទន្លេដើម្បីឲ្យវាផឹកទឹកបាន​ ​តែផឹកឬមិនផឹកគឺអាស្រ័យទៅលើសត្វសេះនោះឯង។​  យ៉ាងណាម៉ិញ ដូចគ្នានេះផងដែរ អ្នកអាចឃាត់មនុស្សឲ្យនៅជាមួយអ្នកបាន តែអ្នកមិនអាចឃាត់ចិត្តរបស់គាត់ឲ្យនៅជាមួយអ្នកបាននោះទេ បើគាត់មិនចង់។

ជិតតែឆ្ងាយ

អង្គុយជិតគ្នាបង្កើយ តែហាក់ដូចជាឆ្ងាយពីគ្នារាប់គីឡូម៉ែត្ររីឯអ្នកដែលនៅឆ្ងាយពីគ្នារាប់គីឡូម៉ែត្រ តែហាក់ដូចជានៅជិតបង្កើយ បច្ចេកវិទ្យាទំនើបបានធ្វើឲ្យអ្នកឆ្ងាយហាក់នៅជិតបង្កើយ តែបែរជាធ្វើឲ្យមនុស្សដែលនៅជិតគ្នាមានអារម្មណ៍ថានៅឆ្ងាយពីគ្នាទៅវិញ ព្រោះអ្នកដែលនៅជិតគ្នារវល់ទំនាក់ទំនងជាមួយអ្នកដែលនៅឆ្ងាយ មិនបានគិតដល់អ្នកដែលនៅកៀកនឹងខ្លួន។ ទំនាក់ទំនងសម័យបច្ចុប្បន្នបានពឹងផ្អែកស្ទើរទាំងស្រុងទៅលើបច្ចេកវិទ្យាទំនើប រហូតដល់មិនសូវខ្វល់អំពីការទំនាក់ទំនងផ្ទាល់ដែលមិនពឹងអាស្រ័យទៅលើបច្ចេកវិទ្យា។ មនុស្សជំនាន់នេះរវល់ធ្វើការតាំងពីព្រលឹមរហូតដល់ព្រលប់ ទើបបានជួបជុំក្រុមគ្រួសារ អ្នកខ្លះរកតែពេលជួបជុំគ្រួសារសឹងមិនបាន អ្នកខ្លះមានពេលជួបជុំគ្រួសារហើយតែបែរជារវល់តែនឹងសម្ភារៈទំនើបរបស់ខ្លួនភ្លេចគិតពីតម្លៃនៃការជួបជុំក្រុមគ្រួសារនិងមនុស្សជាទីស្រឡាញ់។ តើអ្នកមានពេលអង្គុយជួបជុំក្រុមគ្រួសារនិយាយគ្នាលេងប៉ុន្មានដងក្នុងមួយជីវិតរបស់អ្នក? តើអ្នកដឹងទេថានឹងមានអ្វីខ្លះកើតឡើងនៅថ្ងៃស្អែក? ហេតុអ្វីក៏អ្នកមិនព្យាយាមបង្កើតការទំនាក់ទំនងផ្ទាល់ឲ្យបានល្អ? ហេតុអ្វីក៏អ្នកនៅកាន់ឧបករណ៍ទំនើបរបស់អ្នកនៅពេលដែលជួបជុំក្រុមគ្រួសារទៀត? តើអ្នកឲ្យតម្លៃនៃការជួបជុំគ្នាដោយគ្រាន់តែបង្ហាញវត្តមានតែប៉ុណ្ណឹងទេឬ?  អ្នកនៅជុំវិញអ្នកមិនអាចនៅជិតអ្នកមួយជីវិតបានទេ ដូច្នេះអ្នកគួរកសាងអនុស្សាវរីយ៍ពិតជាមួយពួកគាត់ឲ្យបានច្រើន ហើយកុំយកឧបករណ៍ទំនើបៗទាំងនោះជាអាទិភាពអី! ផ្តល់តម្លៃដល់អ្នកដែលនៅជុំវិញអ្នកនិងពេលវេលារបស់ពួកគាត់ ដោយទុកឧបករណ៍ទាំងនោះនៅម្តុំបើមិនមានការចាំបាច់ ហើយបែរមកសប្បាយរីករាយជាមួយក្រុមគ្រួសារនិងមនុស្សជាទីស្រឡាញ់របស់អ្នកវិញទើបប្រសើរជាង។ សូមកុំចាំពេលដែលពួកគាត់ទៅឆ្ងាយពីអ្នកហើយ ទើបអ្នកយំស្រណោះព្រោះមិនបានមើលថែរ ឬផ្តល់សេចក្តីសុខដល់ពួកគាត់បានគ្រប់គ្រាន់។ បំណងល្អពី មេរៀនជីវិត

ទឹកសណ្តែកដាក់ពងមាន់

គំនិតអប់រំខ្លី៖ ទឹកសណ្តែកដាក់ពងមាន់ ជារៀងរាល់ព្រឹក មានបុរសចំណាស់ពីរនាក់តែងតែទៅពិសារទឹកសណ្តែកនៅហាងមួយក្បែរផ្សារ។ អ្នករត់តុ៖ ពិសារទឹកសណ្តែកមែនទេលោកអ៊ុំ? បុរសទី១៖ បាទទឹកសណ្តែកស ហើយដាក់ពងមាន់មួយផង! អ្នករត់តុ៖ បាទលោកអ៊ុំ! ចុះលោកអ៊ុំខាងណេះវិញ ពិសារទឹកសណ្តែកដាក់ពងមាន់ដូចគ្នាមែនទេ? បុរសទី២៖ បាទត្រូវហើយ… ទឹកសណ្តែកស ហើយដាក់ពងមាន់ដូចគាត់ដែរ… តែសុំដាក់ពងមាន់ដោយឡែកពីទឹកសណ្តែក! អ្នករត់តុ៖ បាទ យល់ហើយលោកអ៊ុំ! ……………ពេលអ្នកទាំងពីរបានផឹកទឹកសណ្តែកអស់ប្រមាណជិតកន្លះកែវមក…….. បុរសទី១៖ លោកបង.. បើលោកបងគង់តែនឹកចាក់ពងមាន់ចូលកែវទឹកសណ្តែកដដែល ម៉េចក៏លោកបងមិនឲ្យគេដាក់ចូលគ្នាឲ្យហើយទៅ?  បុរសទី២៖ លោកប្អូនហ្អា… លោកប្អូនគិតទៅមើល បើខ្ញុំឲ្យគេដាក់ពងមាន់ចូលក្នុងកែវជាមួយទឹកសណ្តែកតែម្តង នោះខ្ញុំនឹងខាតទឹកសណ្តែក ព្រោះអ្នកលក់ត្រូវដកទឹកសណ្តែកមួយចំណែករបស់ខ្ញុំចេញពីកែវ ដើម្បីចាក់ពងមាន់ចូលទៅក្នុងកែវទឹកសណ្តែករបស់ខ្ញុំបាន។  បុរសទី១៖ វាមិនខាតប៉ុន្មានទេលោកបង! បុរសទី២៖ ហាហា… បើយើងមើលទៅអ្នកលក់វិញ គាត់សន្សំចំណែកដែលដកចេញបែបនេះតែបួនទៅប្រាំកែវ គាត់អាចលក់បានមួយកែវទៀតហើយ! អញ្ចឹងម៉េចក៏យើងមិនយកទឹកសណ្តែកមួយកែវរបស់យើងហ្នឹងមកវិញ? បុរសទី១៖ អូហ៍.. យល់ហើយ! លោកបងពិតជាគិតល្អិតមែន! នេះជាគំនិតអប់រំមួយដែលបង្រៀនយើងឲ្យចេះសន្សំសំចៃ ទោះជាបរិមាណបន្តិចបន្តួចក្តី។